• Abenduaren 6 eta 8 artean Lakua Gizarte Etxean burututako informatika-bilkurak egundoko arrakasta izan du. Partaidetza aldetik, %50ean gainditu dira aurreikuspen baikorrenak; eta egoitza berriak erosotasun handiagoa eskaini die parte-hartzaileei
• Iazko konexio-abiaduraren bikoitza eman du partyak: segundoko 20 gigabit. Horrela, munduko ordenagailu-topaketa azkarrenen artean kokatu da Araba Encounter. Erronka teknologikoa ere gainditua izan da, sarea egonkor eta gertakari azpimarragarririk gabe mantendu baita
• Prestakuntza-eskaintzak izan duen harrerarekin pozik daude antolatzaileak, informatika zale mordoak hartu baitu parte hiru egunotan gauzatutako hitzaldi eta tailerretan
• Euskaltel Konekta Fundazioak antolatu eta babestu du ekimena, Arabako Foru Aldundiaren, Eusko Jaurlaritzaren (SPRI) eta Gasteizko Udalaren laguntzarekin

Gaur itxiko ditu ateak abenduaren 6tik etenik gabe gauzatu den Araba Encounter 06 topaketak. Antolatzaileen esanetan, bilkura informatikoak egundoko arrakasta izan du; izan ere, partaidetza aldetik, %50ean gainditu dira aurreikuspen baikorrenak, eta egoitza berriak, Lakua Gizarte Etxeak, erosotasun handiagoa eskaini die parte-hartzaileei. Guztira, 4.678 pertsona gerturatu dira hiru egunotan partyra.
Gainera, iazko konexio-abiaduraren bikoitza izan da aurten: segundoko 20 gigabit. Horrela, munduko ordenagailu-topaketa azkarrenen artean kokatu da Araba Encounter. Erronka teknologikoa ere gainditua izan da, sarea egonkor eta gertakari azpimarragarririk gabe mantendu baita.
Prestakuntza-eskaintzak izan duen harrerarekin ere pozik agertu dira antolatzaileak, informatika zale mordoak hartu baitu parte hiru jardunaldiotan gauzatutako hitzaldi eta tailerretan.
Euskaltel Konekta Fundazioak, Arabako Foru Aldundiaren, Eusko Jaurlaritzaren (SPRI) eta Gasteizko Udalaren laguntzarekin, antolatu eta babestutako ekimenak kokapen erabat sendoa du Arabako ekitaldi teknologikoen egutegian. Horren isla da zale amorratuek euren eserlekua lortzeko egiten duten lehia bizia: aurten, 340 ordenagailu-postuak bost minutu eskasetan erreserbatu zituzten partaideek, eta Lakua Gizarte Etxera gerturatutako bisitarien kopurua espero baino handiagoa izan da.

Parte-hartze handia
Parte-hartzaileek arte digital, software libre, joko eta hardware arloetako ekintzetan jardun dute, beste jarduera askoren artean. Gainera, hainbat prestakuntza-saio gauzatu dira: adibidez, errealitate birtuala, segurtasun informatikoa, kriptotxanponak, programazioa, robotika edo musika digitala jorratu dituzten hitzaldi eta tailerrak. Bilkurako arlo guztietako arduradunek partaidetza handia eta lehiaketetan esku hartu duten pertsonen talentua azpimarratu dituzte.
Araba Encounter Gipuzkoa Encounter eta Euskal Encounter antolatzen ditu Euskadin, eta Technium R Encounter (Ourense) eta XGN R Encounter (Pontevedra) Galizian. Urtean zehar mundu digitalaren zaleen eta profesionalen artean ezagutzak, ideiak eta balioak partekatzea da Encounter sareko ekimenen helburua.

Araba Encounter euskal informatika-partyen sarearen barne dago, Gipuzkoa Encounter eta Euskal Encounter euskal bilkurekin eta Galiziako Technium R Encounter (Ourense) eta XGN R Encounter (Pontevedra) partyekin batera. Informazioaren eta komunikazioaren teknologien testuinguruan, pertsonen, enpresen eta egitasmoen arteko konexioa bultzatzeko xedez antolatzen ditu Euskaltel Konekta Fundazioak informatika-topaketa horiek, urtean zehar mundu digitalaren zaleen eta profesionalen artean ezagutzak, ideiak eta balioak partekatzeko.