Araba Encounter 06 ziztu bizian jarri da gaur martxan, Lakua Gizarte Etxean, eta inoiz baino konexio-abiadurari bizkorragoa eskainiko du: segundoko 20 gigabitekoa, iazko bikoitza. Ekimenaren lehen orduetan nabarmen gainditu da aurreikusitako bisitarien kopurua; izan ere, haur eta familia ugari bertaratu dira teknologia berrien, prestakuntzaren eta sormen digitalaren bilkura ezagutzera.
Opengune zona irekian gauzatzen ari diren tailer eta hitzaldiek erakargarritasun handia dute bertaratuentzat. Gainera, publiko orokorrari irekitako eremuan aukera dute 3D inprimaketaz, errealitate birtualaz, segurtasun informatikoaz, musika digitalaz, programazioaz edota bideo-jokoez ikasi eta gozatzeko.
Gaur eguerdian burututako inaugurazio ekitaldian, Euskaltel taldeko Marketin zuzendari Koldo Unanuek eskerrak eman dizkie partya posible egin duten boluntario guztiei, eta euskal telefonia konpainiaren ekarpena azpimarratu du. Banda zabala eskaintzeaz gain, ezagutza zabaltzeko apustua egiten du Euskaltelek, hori baita Encounter sareko ordenagailu-topaketen oinarri nagusietarikoa.
Eusko Jaurlaritzako Ekintzailetza, Berrikuntza eta Informazioaren Gizarte saileko zuzendari Aitor Urzelaik adierazi duenez, Araba Encounterrek Euskadiko 4.0 Estrategiak barne hartzen dituen elementu guztiak ditu bere baitan: talentua, konektibitatea eta zibersegurtasuna.
Bestalde, Arabako Foru Aldundiaren Ekonomiaren Garapenaren, Berrikuntzaren eta Erronka Demografikoaren saileko diputatu Pilar García Salazarren esanetan, banda zabala Arabako bazter guztietara hedatzeko konpromisoa du diputazioak. Aldi berean, partyko emakumezko partaideak zoriondu ditu “gustukoa dutenari ekiteagatik eta kristalezko mugak apurtzeagatik”.
Inaugurazio ekitaldian Gasteizko Udaleko Herritarren Partaidetzaren, Gardentasunaren eta Gizarte-etxeen saileko arduraduna den Borja Rodriguezek, berriz, Udalak teknologia berrien alde apustua egin duela ziurtatu du, biztanleen ongizatea hobetzeko erreminta bezala erabiltzeko asmoarekin.
Doako hitzaldi eta tailerrak
Hiru egunotan zehar prestakuntza-ekintza ugari burutuko dira, gain anitzen inguruan: zibersegurtasuna, kriptotxanponak edota programazioa. Horrez gain, partaideek musika digitala lantzeko eta sare sozialetan edukia sortzeko aukera izango dute tailerretan.
Informazioaren eta komunikazioaren teknologien testuinguruan, pertsonen, enpresen eta egitasmoen arteko konexioa bultzatzeko xedez antolatzen ditu Euskaltel Konekta Fundazioak informatika-topaketa horiek, urtean zehar mundu digitalaren zaleen eta profesionalen artean ezagutzak, ideiak eta balioak partekatzeko.
